Trasparenza

Il-ftuħ u t-trasparenza ilhom valuri ewlenin tal-EFSA minn mindu twaqqfet fl-2002. Bħala korp pubbliku, l-EFSA għandha obbligu ta’ rendikont lejn in-nies li twaqqfet biex isservi – iċ-ċittadini tal-Unjoni Ewropea, li mingħajr il-fiduċja u l-kunfidenza tagħhom l-Awtorità ma tistax tiffunzjona b’mod effettiv.

Regolament ġdid dwar it-trasparenza u s-sostenibbiltà tal-valutazzjoni tar-riskju tal-UE fil-katina alimentari, li ilu fis-seħħ mis-27 ta’ Marzu 2021, isaħħaħ il-kapaċità tal-Awtorità li twettaq il-funzjonijiet tagħha ta’ valutazzjoni tar-riskju f’konformità mal-ogħla standards ta’ trasparenza.

Matul il-fażi ewlenija tal-implimentazzjoni tar-regolament li wasslet għad-dħul fis-seħħ tiegħu, l-EFSA kkomunikat mill-qrib mal-partijiet ikkonċernati permezz ta’ Bord ta’ Diskussjoni ddedikat u għadd ta’ gruppi tekniċi. Tista’ ssib aktar informazzjoni hawnhekk. L-EFSA tkompli tinteraġixxi mal-partijiet ikkonċernati u mal-Istati Membri fl-istadji bikrija tal-applikazzjoni tar-regolament, billi tipprovdi appoġġ permezz ta’ webinars immirati (eż. proċedura ta’ applikazzjoni għal kull qasam ta’ prodott regolat), laqgħat tekniċi (eż. is-sottogrupp IUCLID tan-Network ta’ Tmexxija dwar il-Pestiċidi (PSN)), konsultazzjonijiet bil-miktub (eż. man-network tal-OĠM) u l-grupp ta’ LinkedIn iddedikat biex jappoġġja lill-applikanti. Dawn huma kkomplementati minn komunikazzjoni proattiva dwar il-bidliet, l-aġġornamenti u l-aħbarijiet rilevanti relatati mar-Regolament dwar it-Trasparenza.

L-EFSA taħdem kontinwament biex ittejjeb l-għodod diġitali disponibbli għall-applikanti u għal partijiet ikkonċernati oħra. Informazzjoni dwar it-titjib diġitali li se jsir hija disponibbli hawnhekk.

Ħarsa ġenerali lejn l-interazzjoni għall-2022 issa hija disponibbli biex tgħin lill-partijiet ikkonċernati u lill-Istati Membri fl-ippjanar tagħhom. Din se tiġi aġġornata regolarment.

L-EFSA hija impenjata wkoll li tiżgura li l-operaturi tan-negozji u l-applikanti jkollhom l-informazzjoni u l-appoġġ kollha li jeħtieġu għal tranżizzjoni mingħajr xkiel lejn l-ambjent il-ġdid. Pariri, materjali ta’ sostenn, u dettalji dwar opportunitajiet ta’ taħriġ huma disponibbli fit-taqsima tal-Applicants’ Toolkit tas-sit web tal-EFSA.

Ir-regolament ġie introdott bil-għan li tiżdied it-trasparenza tal-valutazzjoni tar-riskju fil-katina alimentari, li jissaħħu l-affidabbiltà, l-oġġettività u l-indipendenza tal-istudji ppreżentati lill-EFSA, u li tissaħħaħ il-governanza tal-EFSA sabiex tiġi żgurata s-sostenibbiltà fit-tul tagħha. B’mod partikolari jistipula li:

• Iċ-ċittadini se jkollhom aċċess għal studji u informazzjoni ppreżentati mill-industrija fil-proċess tal-valutazzjoni tar-riskju. Il-partijiet ikkonċernati u l-pubbliku ġenerali se jiġu kkonsultati wkoll dwar l-istudji ppreżentati.
• L-EFSA se tiġi mgħarrfa bl-istudji kollha kkummissjonati biex jiġi ggarantit li l-kumpaniji li japplikaw għall-awtorizzazzjonijiet jissottomettu l-informazzjoni rilevanti kollha. L-Awtorità se toffri wkoll pariri lill-applikanti qabel is-sottomissjoni tal-fajls.
• Il-Kummissjoni Ewropea tista’ titlob lill-EFSA tikkummissjona studji addizzjonali u tista’ twettaq missjonijiet ta’ ġbir ta’ informazzjoni biex tivverifika li l-laboratorji/studji jikkonformaw mal-istandards ta’ kwalità.

Tista’ ssir taf aktar dwar ir-regolament fuq is-sit web tal-Kummissjoni Ewropea.